குதிரைக்காரி

சிவப்பு,  மஞ்சள், பளுப்பு

என எதுவும் நிறுத்தாது அவளை

வடிவற்ற எந்த வடிவிலும்

எந்த தளத்திலும் எப்படியேனும் 

ஒரு குதிரையை வரைந்து

உயிரோடு கொணர்ந்திடும்

சாகசக்கார தோழி அவள்

பிடரி மயிர் சிலிர்க்க

கால் தசைகள் அதிர

ஓடியபடியே இருக்கும்

கட்டற்ற அதன் குணமே

தனக்கு பிடிக்கும் என்பாள்

இருபது வருடம் கழித்து

இப்போது தான் பார்க்கிறேன்

இன்னும் வரைகிறாயா என்றேன்.

சவாரி குதிரைகளை 

வரைவது தண்டனை என்கிறாள்.