அளவற்ற திருட்டின் பெயரால் ஆரம்பிக்கிறேன் ♦
ஓ! திருடுபவரே ♦ வீடு வீடாகத் திருடுவீராக ♦ வீடுகளெல்லாம் இங்கு திருடப்படுவதற்காகவே கட்டப்படுவதைப் புரிந்துகொள்வீராக ♦ ஓ ! இரவு பகலெனத் திருடுபவரே ♦ ஏன் ஒரே ஒரு சாவியை வைத்திருக்கிறீர் ♦ மேலும் அதனைக் கொண்டே எல்லாக் கதவுகளையும் திறக்கவும் முனைகிறீர் ♦ பின் திறக்காத கதவுகளையிட்டுக் கவலையும் கொள்கிறீர் ♦ திறக்காத கதவுகளிருக்கும் வீட்டுக்காரர்களைத் திட்டித் தீர்த்தது போதும் ♦ ஓ ! திருடுபவரே ♦ கதவுகளின் வித்தியாசங்கள் பற்றி அறிவீராக ♦ உங்களின் சாவிக்குத் திறந்து கொள்கிறதே, அவ்வீட்டிற்குள் நீங்கள் கைப்பற்றுபவைகளை ஒப்பிட்டுப் பார்க்கவே மாட்டீர்களா ♦ நீங்கள் திருடி வருபவைகள் எல்லாம் சதுரவடிவங்களாகவே இருக்கின்றன ♦ இதனை நீங்கள் சிந்தித்துப் பார்க்க வேண்டாமா ♦ ஒ ! திருடுபவரே♦அந்த ஃபாகனைப் உற்றுப் பார்ப்பீராக ♦ அவன் பைகளுக்குள் இருந்து எடுக்கும் சாவிக் கொத்துக்களை♦ பின்பவன் செய்வதையும் கவனியுங்கள் ♦ அந்தக் கதவடியில் அமர்ந்து கொள்ளும் அவன் வைத்திருக்கும் சாவியில் ஆயுதம் கொண்டுரசி மாற்றங்கள் செய்வதை ♦ மேலும் பாருங்கள் அவன் திருடிவரும் பன்மையான வடிவப் பொருட்களை♦ நாம் அவனையே உங்களுக்கான முன்னுதாரணமாய் ஆக்கினோம் ♦ நீங்கள் வைத்திருக்கிறீர்களே அந்த சாவியில் மாற்றங்கள் செய்தாலன்றி உங்களால் புதிய வீடுகளில் திருடவே முடியாது ♦ மேலும் புதிய வடிவங்களை கண்டுகொள்ளவும் மாட்டீர் ♦ நாம் திருடுவோருக்காகவே அன்றி இந்த வசனங்களை எல்லாம் இங்கு புனைந்து வைக்கவில்லை ♦ யாரெல்லாம் முற்றிலும் புதிய வீடுகளில் திருட விரும்புகிறார்களோ அவர்களுக்கே இதனை வழிகாட்டும்படி அமைத்தோம் ♦