சாகிப்கிரான் கவிதைகள்

•  வெளி

மூன்று பையன்கள்
பேட்டைக் கட்டிக் கொண்டு
சைக்கிளில் செல்வதை
இரயிலுக்குள் வெளியாகவும்
வெளிக்குள் தனியாக இரயிலும்
நிகழ்ந்து கொண்டிருந்தது.

•  தீர்ப்பு

வெறி பிடித்துவிட்டதாக
அடித்துக் கொன்றார்கள்
பிறகு
ஒவ்வொரு குதிரையும்
தன் வழியில்
கிளம்பி சென்றது.

• தேர்வு

அந்தப் பாழைடைந்த
ஊரைக் கடக்கும்போது
பார்த்தவளின் நைட்டி
ஒரு தேவதையின்
உடையாகவே இருக்கிறது
அவர்கள் எங்கிருந்தாலும்
தேவதைகளாகிவிடுவது
ஆடைகளின் மோட்சம்.

• இருப்பு

எதுவுமே நடக்காததுபோல
அந்த ஹெல்மெட் கிடந்தது.
மேட்டிலிருந்து பள்ளத்திற்கு
அது மட்டுமே உருண்டு வந்தது.
அப்புறம் அது
மக்கும்வரை
அங்கேயே இருந்தது
அநாதையாக.

•  விதி

வலப்பக்கத்தில் முந்துகிறவர்களைக்
கணித்துவிடலாம்
இடது பக்கம் முந்துவது
நால்வழிச் சாலைகளின்
மிச்சம் போலிருக்கிறது
அவனுக்கு நான்
வலதுதான் என்பதுதான்
புதிய வாதம்
புதிய சவாலும்
தேவனே!