கட்டுடைத்தல்

நிறங்களின் மணத்தை நுகர்ந்தபடி
காற்றில் மிதந்த கனவின் ஊஞ்சலை
அறுத்து எறிதல் கடினமாய் இருக்கிறது.
நுகர்கிற நொடிதோறும்
மெருகேறி மிளிரச்
செய்த கனங்கள் அவை.
கடக்கிறவர்கள் சிலர்
ஊஞ்சலை ஆட்டி
ஒப்புதல் தந்ததும் உண்டு.
அந்த கண்ணாடிப் பாலத்தையும்
உடைத்த முயற்சியில்
சிதறிய சில்லுகள்
ஏதும் கிழிக்காமலே
துளிர்த்துக் கிளம்புகிறது குருதி.
கட்டுடைத்தலின்
இடிபாடுகளுக்கு இடையே
நரைக்கத் தொடங்கிய தலையோடு
புன்னகையைக் கூட அலங்காரம்
என மறுத்து
இறுக்கமாய் இருக்கும்
இந்த எதார்த்தத்தைக்
கொஞ்சமும் பிடிக்கவில்லை எனக்கு.

குரல் : சாய் வைஷ்ணவி

கவிதையின் ஒலிவடிவத்தை  Spotify செயலி மூலமாக கேட்க :