அந்தர அரவம்

தன் தேசத்திலிருந்து 

இன்று காலை விமானத்தில் பயணப்பட்டு

வெளிநாட்டின்

முந்தைய நாளின் இரவில்

இறங்குகிறவன், 

மறுநாள் காலையில்

ஒரே தேதியிட்ட இரு காலைகளை

வாழ்ந்தவனாவான்.

ஒன்றில் 

செல்லமான முத்தங்கள்

மற்றதில்

செல்வத்திற்கான யுக்திகள்.

இரண்டுக்கும் நடுவிலான

இந்த இரவு, 

ஒரு அரவத்தின்

லட்சணங்கள் நிறைந்தது… 

அது பாதியுடலால் 

வசிக்கும் மரக்கிளையை

இறுகப்பற்றியும், 

மீதியுடலால் 

இரையை குறிபார்த்தும் 

அந்தரத்தில் ஆடியபடியிருக்கிறது.

இந்தக் கவிதைகள் Spotify App -இல் உள்ள  Nutpam- Podcast –லும் ஒலிபரப்பாகிறது.