கவிதைக்காரன் இளங்கோ கவிதைகள்

1) பனிக்குடம் சுதைக்கின்ற உயிரி.

புதிதாகச் சொல்ல ஒரு கதை இருப்பதாக
நம்பிக் கொண்டு
விண்சாம்பல் விலகும் முன்னே

எனது திசையை தொலைத்தபடி
வைகறைப் பொழுதை புறக்கணித்துவிட்டு
நான் கடந்து போனது
உன்னுடைய வாசலையும் தான்

விருந்துக்கு அடித்துக் கொன்றிட
வளர்க்கப்பட்ட நாட்டுக்கோழியின் ருசியை அறிந்திருப்பது
விதியின் பலிபீடத்தில்
தலை சாய்த்து தூங்கி அசதி போக்கிக்கொள்ள
ஒரு சரியான ஏற்பாடு என்கிறேன்

சத்தியங்கள் மொக்குடைந்து நறுமணம் பகரும் என்றால்
உதிரம் திரிந்து அர்த்தம் குமையும்
பிசுபிசுப்பில்
சொல்லப்படாதவைகளின் ரகசியங்கள்
முதலிரவில் உடலைப் பகிர்ந்துகொள்ளும் வரை
காத்திருப்பதோடு
ஓர் அன்னியம் முடிவுக்கு வருகிறது

புதிதாக சொல்ல ஒரு கதை இருந்ததாக
கருமுட்டைகள்
மாதாமாதாம் உப்பி வெடிக்கின்றன

பல லட்சத்தில் ஒன்றென
வம்ச வேர்களில் கொடிச்சுற்றி நஞ்சு ஏறும் போதையை
மார்க்காம்பை வாயில் திணித்து
புகட்டும் கதைகளில்
புரதச் சத்துள்ள கதாபாத்திரங்கள்
திடங் கொள்கின்றன
சமூகத்தை ஆள.

மாறாக,

பீடங்களில் மெழுகப்படும் கவுச்சிகளை
வாக்கியங்களாக புனையும் பொருட்டு
வைகறைகளின் விரைகளை கால்களால் மிதித்து
துவம்சம் செய்யும் பொருட்டு

விடாய் நாட்களின் கணக்குத் தப்புதலை
எத்தனை கோடுகள் கொண்டு அளந்தாக வேண்டும்
என்கிற அட்டவணையை
மனனம் செய்வதிலிருந்து தொடங்கலாம்
புதிது புதிதான கதைகளின் ருசியை.

2) கழுவில் ஏற்றப்படாத பீடம் என..

தீமையின் தடத்தை
தொழுவதற்கும் முன்பாக
இழப்பின் நம்பிக்கை முகத்தின் முன் சூழ்ந்து
மேகமாகி இருள்கிறது

ஒரு வாதத்தின் வாயிலில்
அனுமதியற்று நிறுத்தப்பட்டிருக்கிறேன்
மனம் குவியத் திணறும் மையத்தில்
சத்தியத்தின் கனி அழுகிடத் தொடங்குகிறது

சாட்சியங்களாக
எஞ்சியுள்ளவை ஒரு பெருவாழ்வின்
அடர் பொழுதுகள் மட்டுமே

எதுவாவது சொல்லிடத்தான் வேண்டுமெனில்
என் நாக்கை அறுத்து
உங்கள் மேஜையின்மீது வைத்துவிடுவேன்

எதுவாவது சொல்லிடக்கூடாது என்றாலும்
அறுபட்ட எனது நாக்கை
உங்கள் மேஜையின்மீது புரட்டிப் பார்க்காமல்
இருந்துகொள்ளலாம்

கருஞ்சிவப்பு வார்த்தைகள் இறுகி உறையவோ
அதில்
ஈக்கள் மொய்க்கவோ
அவகாசம் தேவைப்படலாம்.

3) போய் வளைந்து வந்து போய், வளைந்து..

நொடிப்பொழுதில் எல்லாமே கொஞ்சம்
இடம் மாறிப் போகிறது
இதுவரை பயணித்த சாலைகள்
இதுவரை உண்ட உணவு
இதுவரை சந்தித்த நபர்கள்
இதுவரை பெற்றிருந்த வாக்குறுதி
இதுவரை காத்திருந்த தருணங்கள்

எல்லாமே கொஞ்சம் மாறிப் போவதால்
எதிர்கொள்ள நேர்கிறது
இதுவரை பயணித்திராத சாலைகளை
இதுவரை செரிமானமாகாத பொழுதுகளை
இதுவரை உணர்ந்திராத தகுதிகளை
இதுவரை காத்திராத தருணங்களை
இதுவரை சந்தித்திராத ஆன்மாக்களை

கொஞ்சம் இடறி மல்லாந்து விழுந்தாலும்
முழுவதுமாகத் தெரிந்துவிடுகிறது
வானம்.

4) உள் அல்லது வெளியாக..

ஒரு சிறிய தாழ் நீங்குதல் குறித்து
பேசிக்கொண்டிருந்தோம்
நேற்று
பழந்துரோகத்தின் உப்புச்சுவையோடு

குளிர்காற்று ஊடுருவி நம்மை ஒட்டுக்கேட்கவில்லை
கலந்துகொண்டது உரையாடலோடு

இதுவரையிலான
முன்தீர்மானங்கள் எந்த துருவத்தின் முனையில்
கொண்டு போய் நிறுத்தும் என்பதனை
அறியோம்

ஆனால்
திசைவழிப் பயணமோ பாய்மரங்களை
கீழே இறக்கவிடுவதில்லை
பிரியத்தின் பெயரால்.

 கவிதைகள் வாசித்த குரல் : வித்யா கண்ணன்

Art Courtesy : Ricardo Maya

 இந்தக் கவிதைகளை Spotify App மூலமாகவும் கேட்கலாம்.