நீலநிற சீருடை அணிந்தவர்

ஆளு படை அம்பு
தண்ணி பாய்ச்ச
நாற்றுநட களையெடுக்க
அறுவடைக்கென
கிழங்கு பிடுங்கும் நாளில்
பெருநகர நெரிசலாய்
அடுத்த காடுவரை
நீண்டிருக்கும் வண்டிகள்

கலைந்துபோன மேகமாக
அதிகாலை கனவாக
அத்தனையையும் அழித்தது
மாயக்கரமொன்று

பித்தக்கற்களால் அடிவயிறு பிடித்தபடி
அமர்ந்திருந்தவர்
வண்டி சத்தத்தில்
திடுக்கிட்டு எழுந்து
கதவு மூடி நின்றபோது
கைகளில் விழுந்தது பத்து ரூபாய்த்தாள்

ஒரு வினாடி தயங்கிப்பின்
கும்பிட்டு வாங்கிக் கொண்டன
படியளந்த கரங்கள்

நடுங்கியபடி இருக்கும்
மரத்துப்போன கால்களுடன்
நீரில் நனைத்த கைக்குட்டையை
தலையில் துடைத்தபடி
வெயிலை வெறித்தபடியிருந்தவர்
குரல் வந்த திசைநோக்கி
ஓடினார் பள்ளி மாணவராக

வாழ்ந்து கெட்டவர்கள்
நடைப் பிணங்கள்
சாவென்பது தினசரிக் காலண்டரில்
ஒரு தாள் கிழிப்பது போல

கவிதையும் குரலும் : கண்ணன்

இந்தக் கவிதையை ஒலி வடிவத்தில் Spotify  இல் கேட்க :