காப்பாள்

நிரம்பி வழியும் கட்டைப் பைகளில்
ஒன்றை
கைப்பிடியை நேக்காகப் பிடித்து
இரண்டாவது படிக்கட்டில் அமர்த்திவிட்டு,
வேகவேகமாக இறங்கி
அந்தப் பையையும் தூக்கிக்கொண்டு
கண்டக்டரைப் பார்த்துத் தலையாட்டிச் சிரித்தவன்
எஸ்.எஸ்.நகருக்கு ஆட்டோ பிடிக்க
பழக்கமான ஸ்டாண்டுக்கு நடக்கிறான்.
பத்தடி நடந்தவுடன்
சுண்டி இழுக்கிறது
‘சீனிவாசா போளி ஸ்டால்’ கலவை மணம்,
கடையைத் தாண்டிப் போனவன்
திரும்பி வந்து
பார்த்துப் பார்த்துப் பலகாரம் வாங்குகிறான்.
புதுத் துணி இருக்கும் பையில் வைத்துவிடாமல்
கவனமாகக்
காய்கறிப் பையில் பதுக்கி வைக்கிறான்.
‘இருவது நிமிசந்தானே.. நடந்துக்கலாம்’
ஆட்டோவைத் தவிர்த்துவிட்டு
தீபாவளியை இரண்டு கைகளில் ஏந்தி நடக்கிறான்
நல்லதங்காளின் தமையன்.

**

பெருவளாகத் தரைத்தளத்தில்
தானியங்கிப் படிகளின்
காவலுக்கு நிற்கும்
நீலாக்காவின் சுட்டு விரலை
தலைக்கு மேலாக எக்கிப் பிடித்து
பாதவிரல் நுனியில் நின்று
மஞ்சள் கவுன் குடைவிரிக்க
சுழன்று சுழன்று ஆடுகிறாள்
பெரிய திரையில் ‘பாலே’ பார்க்கும்
நல்லதங்காளின் பொம்மி.

**

download

அண்ணன் வரும் நேரம்
பள்ளி முடிந்து
மூத்தவன் வீடு திரும்பும் நேரம்
பொட்டலத்தைக் கொண்டு கொடுக்கத்
தேவைப்படுமென்று
செயலி அறிவிக்கும் நேரம்
ஒன்றுக்குள் ஒன்றாகக் கணக்கிட்டபடி
பொம்மியை அள்ளிக்கொண்டு
ஸ்கூட்டி நோக்கி ஓட
ஸ்விக்கி சட்டை அணிந்து
உணவு கனக்கும் முதுகுப் பையுடன்
இறங்கும் தானியங்கிப் படிகளைத்
தோற்கடித்துத் தாவி வருகிறாள்
நல்ல நல்லாள்.