மலர்விழி இளங்கோவன் கவிதைகள்

• வாலறுந்த நன்றி

மங்கிய வெண்மையில்
படர்ந்த கரும் பொட்டுகளுடன்
தெரு முனையிலிருந்து
ஓடி வந்து முகம் நோக்குகிறது
வாலறுந்த நாய்க்குட்டியொன்று

சிறு ரொட்டித்துண்டு அன்பினை
கண்களில் தேக்கி
வாலுக்குக் கடத்துமது
தொடர்பு எல்லை துண்டிக்கபட்ட
தன் வாலாடாத நன்றியை
பிட்டத்தில் சுருக்குகிறது
இயலாமையோடு

என் கால் வருடிய வாஞ்சையில்
ஈரம் படர்த்தி
முகம் நோக்கும்
அக்குட்டியில் ஆடுகிறது
அரூப வாலொன்று

தொடர் நாட்களில்
நெருங்கித் துள்ளும் அதற்கு
தினமொரு வண்ணமாய்
வால் பொருத்துகிறேன்.

பஞ்சுமிட்டாய் மணியொலி
கடந்த பொழுதொன்றில்
பேரழகாய் வந்து நிற்கிறது
வெள்ளையும், கருப்பும் கலந்த அதனுடலில்
பஞ்சுமிட்டாய் வண்ண வாலாட!

சிட்டுகளின்
ஆயிரம் கூடுடை
பெருந்தருவென
நகர்ந்து வருகிறது
பள்ளிப் பேருந்து
சாலையெங்கும் நிறைகின்றன
கெச்சட்டங்கள்

download (2)

• நீர் மேல் மிதக்கும் வானம்

வானத்தின் மீது தன் பாதங்களை
பூனையின் மிருதுவோடு பதித்தவள்
பஞ்சுப்பொதி மேகங்கள் கலைந்திடாமல் காலகட்டித் தாண்டுகிறாள்.

தடுமாறி விழுந்தவளை ஏந்திக் கொண்ட நீர்
தன் குளிர்மையில் குளிப்பாட்ட
நீர் மிதந்த மேகங்கள்
முழங்கால்களைக் கட்டியணைத்து
அவளை மேயத் தொடங்குகின்றன.

கால்களை உதறிக்கொண்டு
காற்பந்தென அவள் எத்திய மேகம்
துளித்துளி நீர்ச்சுழிகளாய் அலைகின்றன
அவளின் நீர்வெளியில்.

அருகினில் விழுந்து சிரிக்கும்
சூரியனின் மீதும்
நீரள்ளித் தெளிக்கிறாள்
குவிந்த கைகளில் வழியும் செல்லச் சினத்தோடு.
பயந்தோடுவதாய் பாசாங்கிய சூரியன்
மீண்டும் நெருங்கி
தகதகத்துச் சிரிக்கிறான் .

அந்நேரமாய் உதடு குவித்து முத்தமிட்ட
மீனின் ஈர முத்த சலனத்தில்
சுழலும் கனவின் வளையங்களாய்
அலை பாயும் சூரியன்.

சூரியனை முத்தமிட்ட மீன்
நதியலைந்து அவளின் நாணத்திலும்
ஒரு முத்தத்தைப் பதிக்கிறது.

நதியாடிக் கரையேறியவள்
சொட்டிக் கொண்டே செல்கிறாள்
முத்தத்தின் உலராத துளிகளை

–