மஞ்சுளா கவிதைகள்

1. நினைவோசை

ஒரு ஊரிலிருந்து
இன்னொரு ஊருக்கு
தனியொருவனின் இன்பமாய்
வாழ்வை ருசித்து ருசித்து கடந்து போகிறது ரயில்

ஜன்னல் கம்பிக்கு அருகில்
சிறுவன் ஒருவனின் பார்வையில் சிக்கி
பறந்து விடும் ஒரு பறவையை
பின் தொடர முடியாமல்
தவிக்கும் நேரம்
அவனை விரல் தொட்டு மீட்டெடுக்கிறேன்

தட தடக்கும் ஓசையை
இருவருக்கும் இடையில் ஒத்திசைக்கிறான்
இசைஞன் ஒருவன்

கொஞ்சம்
சில்லறைக் காசுகளுடன்
நகர்ந்து போகும் அவனிடம்
கொஞ்சம் பாடச் சொல்லிக் கேட்கிறேன்
பதிலுக்கு
என் செவிகளை மட்டும்
சிறிது நேரத்திற்குக் கடனாகக் கேட்கிறான் அவன்

சிறிய வயதின் ஞாபகங்களுடனும் கதைகளுடனும்
எங்களுக்குக்கான பொழுதுகளை உயிர்ப்பித்தபடி
விரைந்து செல்கிறது ரயில்

காலத்தின் எந்த ஒரு நொடியையும் மீட்டெடுக்கும் ரயில் பயணங்கள்
என்னை மேகத்தின் அருகே
பறக்கும் பறவையாகவும்
பட்டாம்பூச்சியைப் போல்
சிறகடிக்கும் சிறுமியின் மனதாகவும் மாற்றுகிறது

காலம் மெல்ல மெல்ல
ரயில் பயணம் போல் விரைகிறது

பயணிகள் அவரவர் இடம் தேடி அமர்ந்து கொள்கின்றனர்
இசைஞன் பின் பாட்டுப் பாட
தட… தடக்கும் ரயில் சத்தம்