முபீன் சாதிகா கவிதைகள்

1. ஒரு மீன்

வயல் துள்ளும்
கயலின் நீர்த்துளி
கண்ணில் படர்ந்து
திரையிடும் சமயம்
வெளுக்கும் வானத்து
துண்டென இறங்கும்
மதிய நிலாவும்
கதிரின் விளிம்பில்
கனத்து முகிழும்
பனியெனப் பெய்து
தாகமும் நாதமும்
கலக்கும் சொர்ண வயலில்
மணம் பரவும்
அனலென

Endangered Tropical Fish_

****

2.உப்பின் சுவை

கடல் சூழும் விதானம்
உப்பின் தகவாய்
முனைந்திருக்கும் நிழலில்
வயலாடும் வெண்மை
காரமும் படிந்து
ஈரமும் ஓரமும் பரவும்
கல் எனவும் மாறி
கடிந்த மெய்புலம்
வனம் சூழ் அவனியில்
தாள் நிலவி தனித்தாடி
புலவும் புரக்கும்
தாகமதை விடுத்து
நலம் பிரிந்து சேர
நிறம் மாறிப் பெயர
கருமையும் செம்மையும்
கலந்து சுவைக்கூட்ட
மையத்து விளையும்
தூளெனவே

****
3.கிளி மாயம்

சோளக்கருது
காற்றில் பறக்க
கிளியான அவள்
மிகச் சிறுத்து
அக்கருதில் ஒட்டி
சிறு துணுக்கெல்லாம்
சிதறிச் சிதறி
கிளிக்கூட்டம்
கொத்தித் தின்ன
சோளத்தின் மணம்
பறவையின் நாசியில்
புகுந்து அவளுள்
நிறைய வயல்முழுதும்
பரவும் அவளும்
கிளிகளைத் துரத்தி
ஒரு நொடியில்
கருதின் அணுவில்
இழைந்து சோளமென
மாறி கிளிகளின்
உணவாயினளே

****
4.பிறப்பு

தோளிலிருந்து பிரிந்து
பிறந்தது எலும்பின் பிறப்பாய்
வடிவெடுத்தது வலியின் உரு
வாளின் கூரில் வகிர்ந்து
தனித்திருக்கச் செய்தும்
உள்ளிருந்த ஊமை பிணி
ஓயாது என்றே ஊளையிட்டு
முளைத்தது உயிரின் விதை
காயத்தில் வளரும் காயமாய்
குருதி கலந்த நீராக
திடத்தின் நீர்மமாக
பிளவடைந்த பின்னும்
சிரமும் சினையும் பாதியாக
பிறவியின் ஆதிகணமும்
கறைந்து பெருகியது ஊண்

****

5.சரிதம்

அதிரும் புள்ளியில் அமையும் துகளில்
பொதியும் அலை இணையும் பிரியும்
காலச் சுழலின் மின்முன் மாற்றி
ஒற்றை அச்சில் நிலைக்கும் ஊசல்
காரணமும் பதிவினதாய் மாய
காரியமும் மதியினது போல் வெருள
வட்டத்தின் ஆரம் தொடும் மீன்
ஈர்த்தது கோள் விசையுறு பந்தாய்
அகம் விரிந்து அண்டத்தில் கலந்து
பின் உறி தகவில் பாய்ந்து பொழிய
ஒளி என்றும் ஒலி என்றும் மீட்டு
உயிர்ப்பகா சரிதத்தை எழுதும்
கனவாய் மிதந்து குழைந்த எண்ணம்
மறையா புறமும் எங்ஙனம் பயணித்து