தாரிகை கவிதைகள்

ஆற்றில் பிடிக்கும் மீனை போல
அவ்வவபோது நழுவிக்கொண்டே
போகிறது வார்த்தைகள்.

புழுவை கொண்டு தூண்டிலில்
பிடிக்க முயற்சிக்கும் மீனை போல
யோசனைகளை கொண்டு அவனுக்கான
வார்த்தைகளை தேடிக்கொண்டிருக்கிறேன்.

குளத்தில் மீன்களுக்காக காத்திருக்கும்
கொக்கை போல
தக்க சமயத்தை எதிர்பார்த்து
காத்துக்கொண்டிருக்கிறேன் அவனிடம் கூற

இறுதியில் வண்டியில் விற்பனை செய்பவரிடம்
வாங்கும் மீனை போல
‘உன்னை காதலிக்கிறேன்’ என்று மட்டும்
சாதாரணமாக சொல்லிவிட்டேன்!

•  களவாடிய காற்று

ஒவ்வொரு முறை கண்ணாடி பார்க்கும்போதும்
முத்தம் கொடுத்துக்கொண்டே இருக்கிறேன்

அது கண்ணாடிக்கான முத்தமா
இல்லை கண்ணாடியில் தெரியும்
என் பிம்பத்திற்கான முத்தமா
அல்லது எனக்கான முத்தமா என
தெரியவில்லை

இப்படி குழப்பியிருக்கையில்
எனக்கும் கண்ணாடிக்குமான
இடைவெளியில் முத்தத்தை
யாருக்கும் தெரியாமல்
களவாடி சென்றது காற்று!