அவள்கள் அற்புதக்காரிகள்

கொம்புகளற்ற
செம்மறி ஆட்டைப்‌ போல
ஆசைகளற்ற அவளைத் தான்
அவர்களுக்கு விருப்பம்

வளர்ந்த பின் சுருளும் சில
செம்மறி ஆட்டின் கொம்புகள் போல
வளர்த்த பின் வளைக்கப்படுகிறது
அவள் ஆசைகள்.!

கருப்பு, பழுப்பு, இன்னட்டு
நிற செம்மறிகளைக் காட்டிலும்
வெள்ளைக் கம்பளி வணிகச் சந்தையில்
விலைபோவதைப் போலத் தானே
திருமணச்‌சந்தையில் அவளும்.!

பழிச்சொல்லுக்குப் பயந்தே
தன் வினை செய்ய பழக்கப்படுத்தபட்ட
அவள்கள் ஒவ்வொருவருக்கும்
இரைச்சலுக்குப் பயந்து எதிர்வினை செய்யும்
செம்மறியின் சாயல்.!

ஒரு செம்மறி ஆடு
கம்பளியைச் சுமப்பதைப் போல
அவள் கனவுகளைச் சுமக்கிறாள்
அதனாலோ என்னவோ
அவள் கனவுகளும் அதன் ரோமத்தைப் போல
தவறாமல் மழிக்கப்படுகிறது

சேகரித்த ரோமங்கள் யாருக்கோ கம்பளியாகி
கதகதப்பைத் தருவது போல்
சிதறடித்த கனவுகள் யாருக்கோ பலனாகிப் போகிறது.!

இப்படித் தன்னை
புல்லினமாக்கி பல் இளித்த
அந்த ஆட்டு மூளைக்காரர்களின்
கச்சிதப் பிடியில் இருந்து தப்பி
இந்த மந்தையில் இருந்து விலகும்
அவள்கள் அற்புதக்காரிகள்.!