அற்புதம் அம்மா அறிவது

ஈராயிரம் ஆண்டுகளின் முன்பு
அந்த நிலம் பூந்தோட்டமாக இருந்தது
அழகாக அணிவகுத்துச் செல்லும் எறும்புகளைத் தொடர்ந்து
குந்தியபடி நகர்ந்த குழந்தைகள்
பதியனிடம் வந்து சேர்ந்ததும் தயங்கிநின்றனர்
எறும்புகள் ஆயிரமாயிரமாய் மடியும் என்பதால்
கையில் ஏந்தியிருந்த பூவாளித் தண்ணீரை
வார்க்க மனமில்லாது
ரோஜாச் செடியைப்பறித்து வேறிடம் பதித்தனர்

இரண்டாயிரம் ஆண்டுகளின் பின்
மூவண்ணக் கொடியுடன் மரணம் அந்த பூமியில்
காலடி வைத்தபோது ரோஜாக்கள் வாடி உதிர்ந்தன
40,000 சிற்றெறும்புகள் மடிந்தன
சிறுமியர் நசுங்கினர்
2009ஆம் ஆண்டு மே 18
அசோகச் சக்கரம் பின்தலையில் சுழல
செஞ்சேனையின் மாபெரும் தலைவர்
இலங்கைச் சிங்கத்தின் கையில்
பச்சை இரத்தநெடி வீசியவாளுக்குப் பதில்

தமது இலச்சினைகள் பதித்த
புத்தம் புதிய கறுத்த பென்னாம் பெரிய கோலிகள் தந்தார்
அடர்ந்து கறுத்த சீருடையும்
இரத்தச் சிவப்பில் பட்டியும் அணிந்து
முண்டுகட்டிய அழகிய பெண்கள் பரிமாற
கால்கள் தடுமாற அவர்கள் இரவை நிறைத்தனர்

60,000 விதவைகள்
40,000 அநாதைக் குழந்தைகள்
40,000 காணாமல் போனோர்
40,000 சிதறிய உடல்கள்
புத்தர் புன்னகைத்தார்
இரவல் காந்தியின் உயிரின் விலை இதுவென்றது
முள்ளிவாய்க்காலின் கறுத்த புகைவானம்
அதே என்றபடி
துள்ளித்துள்ளி ஆடிக் களித்தது கோதபயாவின் குறி
அமைதி தீவில் எங்கும் பரவியது
அடர்ந்த பச்சைவனங்களின் அருவிநீரில்
தமிழர் குருதி வழிந்து பெருக்கெடுத்து
புத்தபிக்குகளின் பாதங்களை நனைத்தது
சாந்தி சாந்தி என்றபடி
படையினர் கையில் கங்கணம் கட்டி
ஆசி வழங்கினர் புத்தனின் அடிநடந்தவர்

பேரறிவாளன் முருகன் சாந்தன்
இன்னும் ஈராயிரம் ஆண்டுகள்
நடந்தும் கடந்தும் வாழ்வர்
அற்புதம் அம்மாவின் ஒரேயொரு மகனுக்காக
4,000 மகன்கள் மகள்கள்
சே குவேராவிற்கு
ஒரு தென் அமெரிக்க மோட்டார் சைக்கிள் டைரி
பேரறிவாளனுக்கு
இரண்டாயிரம் மோட்டர் சைக்கிள் குறிப்பேடுகள்

அன்னையே அற்பும் அன்னையே
கண்ணீர் திடமாகி உறைந்து
நீதி கோரி நிற்கும் தாய்மையே
உயிர்தரும் தருவே
அழகாக அணிவகுத்துச் செல்லும்
எறும்புகளைத் தொடர்ந்து
குந்தியபடி நகர்ந்த குழந்தைகள் என
ரோஜாப்பதியனிட
மறுபடி நாங்கள் வந்திருக்கிறோம்

பேரறிவாளன் முருகன் சாந்தன்
இன்னும் ஈராயிரம் ஆண்டுகள்
நடந்தும் கடந்தும் வாழ்வர்
இரவல் காந்தியின் உயிரைவிடவும் பெரிது
அடிமை பூமியில் ஒருபோது
சுதந்திரமாய் அழகிய நடனமிட்டு நகர்ந்து
உயிர்த்திருந்த ஒரேயொரு சிற்றெறும்பின் உயிர்.

  இந்த கவிதை 2016- ஆம் ஆண்டு வெளியான யமுனா ராஜேந்திரனின் “ஞாயிற்றுக்கிழமை அதிகாலைச் சதுக்கம் “ எனும் கவிதைத் தொகுப்பில் இடம்பெற்றிருக்கிறது.  யமுனா ராஜேந்திரன் அவர்களிடம் உரிய அனுமதிப் பெற்று ‘நுட்பம்’ -கவிதை இணைய இதழுக்காக  பதிவேற்றம் செய்யப்பட்டுள்ளது .

நன்றி : 

•  யமுனா ராஜேந்திரன்
• விகடன் இணையதளம் (அற்புதம் அம்மாள் – புகைப்படம்)