நெசவாளன் – ஸான்ட்ரா மரியா எஸ்டீவ்ஸ்

நெசவாளனே
பல நூல் இழைகள்‌ இழைந்த பாடலை எங்களுக்காக நெசவு செய்வாயாக

உதிரத்தின் சிவந்த நிறத்தில் நெருப்பை
எங்களுக்காக நெசவு செய்வாயாக
இனிக்கும் பிளம் சுவையோடு
கிளர்த்தும் மரித்தவர்களின் ஞாபகங்களை
பின்தொடரும் காயத்தின்‌‌ வாசனை
எங்கள் முதுகெலும்புகளில்
வலியில் இரத்தம் கசியச் செய்கிறது

எங்களுக்காக வேட்கையின் சிவப்பை நெசவு செய்வாயாக
அது ஒரு புகைமூட்ட மேகத்திற்கு எதிராக சிறகடித்து
எங்கள் நுரையீரலுக்குள் இயங்குவிசையை உந்தட்டும்

எங்களுக்காக மஞ்சள் மற்றும் தங்க நிறத்தில்
ஒரு பாடலை நெசவு செய்வாயாக
அந்த வாழ்வு
புதர்களின் ஊடே ஒரு‌ பாதைக்கு ஒளியூட்டட்டும்
வலியில் எரிந்த பிறகு
நிலையான நம்பிக்கையில் முதிர்ந்து
வீங்கிக் காப்பு காய்த்த
தோல் மறைப்புகளோடு

உன் விரல்களை
பெரும் பள்ளத்தாக்குகளுக்கு இழுத்து
காந்த மையப் புள்ளியில்
எங்களை நெசவு செய்வாயாக
ஒரு தனித்த வலை இடிமின்னலைப் போல் மின்னுகிறது
என் கருப்பைக்குள்
உன் கட்டைவிரலை உணர்கிறேன்
தொடர்ச்சியான உலக இயக்கத்தின் நிறுத்தத்திற்குள்
பூந்தேனின் வியர்வை விதைகளை வைக்கிறாய்

எங்களுக்கு சிவப்பு , மஞ்சள் மற்றும் பழுப்பில் ஒரு பாடல் நெசவு செய்வாயாக
அது கடலையும் வானத்தையும் தன் தோலில் வைத்திருக்கட்டும்
அது பறவையையும் மலையையும் தன் குரலில் வைத்திருக்கட்டும்
அது எங்கள் கல்லறைகளின் மீது ஒரு வீட்டைக் கட்டட்டும்
அநீதி, பயம் ,அடக்குமுறை துஷ்பிரயோகம் மற்றும் அவமானத்தின் மீது
வலிமை,ஒற்றுமை மற்றும் நோக்கம் சார்ந்த அரண்களை அமைக்கட்டும்

நாங்கள் பற்றிக் கொள்ள ஒரு பாடலை நெசவு செய்வாயாக
குளிர்ந்த காற்று வீசி
எங்கள் குழந்தைகள் அழும் போது
கடும் பனியில் மூழ்கும்
பரிசுத்தமான ஆதி பாடல்
காகித்தை எரித்து
மறைந்திருக்கும் நிறமற்ற விஷத்தை எதிர்க்கட்டும்
கரிய இரவின் மென்மையான இதழின் இனிமையில் இருந்து கொண்டு

எங்களுக்காக வளமான கருப்பு வட்டத்தை நெசவு செய்வாயாக
அது எங்கள் போர்வீரக் குழந்தையின் விழிகளில் இருக்கட்டும்
மற்றும் நிலவின்‌ காற்றைக் கொண்டு
எங்கள் வாய்க்கு உணவளிக்கட்டும்
தாளங்கள் இடையிடையே
இருப்பின் எல்லா இடங்களிலும்
ஒரு கருப்பு
நித்தியத்தின் இயக்கத்தை வைத்திருக்கும்

எங்கள் உடல்கள் பாடுவதற்கு
ஒரு பாடலை நெசவு செய்வாயாக

பல நூல் இழைகள் இழைந்த
பாடலை எங்களுக்காக நெசவு செய்வாயாக

அது எம் மக்களின் நிறங்களுடன் நடனமாடி
அமைதியின் வெதுவெதுப்பைக் கொண்டு எங்களை மூடட்டும்

தமிழில் : மலர்விழி