மலர்விழி கவிதைகள்

1. திருப்ப முடியாத பக்கம்

அமேசான் கிண்டிலில் ஒரு மின் புத்தகத்தை புரட்டுகிறேன்
அவன் அப்படி என்னை அடித்தான் என்று முடிந்தது
எப்படி அடித்தான் என்ற கேள்வியுடன் அடுத்த பக்கத்தை திருப்பினேன்
அவனின் கோரைப்பற்களில் சிக்கியிருக்கும்
சதை துணுக்குகள் என் உணர்வுகள் என்றிருந்தது
எதற்கு சாப்பிட்டிருப்பான் என்ற கேள்வியுடன் அடுத்த பக்கத்தை திருப்பினேன்
அவன் கண்கள் ருசித்துக் கொண்டிருக்கும் காணொளியில்
கிழிக்கப்படும் அத்தனை உடைகளும் என்னுடையது என்றிருந்தது
ஏன் கிழித்தான் என்ற கேள்வியுடன் அடுத்த பக்கத்தை திருப்பினேன்
நான் நூலாடை உடுத்திக் கொண்டேன் அவன் விலக்கிப் பார்த்தான் என்றிருந்தது
நீ என்ன செய்தாய் என்ற கேள்வியுடன் அடுத்த பக்கத்தை திருப்பினேன்
பாறையை உடுத்திக்கொண்டு
சிலையானேன் அப்போதும் அவன் தொட்டுப் பார்த்தான் என்றிருந்தது
ஐயோ என்ற பதட்டத்துடன் அடுத்த பக்கத்தை திருப்பினேன்
முற்றும் என்றிருந்தது
கோபத்தில் புத்தகத்தை மூடி வைத்தேன்
போராளிகளே !
இந்தப் புத்தகத்தின் தலைப்பு என்னவாயிருக்கும்?